精明消費套餐抵食75折 大閘蟹季節嚐時令蟹饌

涼風輕輕吹，又到季節變更，夏天遠去秋天降臨的時間，亦是大閘蟹季節的來臨。雖然九月底、十月初大閘蟹仍未算很肥美，食肆已經開始搶飲頭啖湯，有大閘蟹供應，今年第一餐大閘蟹在鴻星集團旗下的尖沙咀星薈吃，因為老闆很進取，率先推大閘蟹堂食有75折，大廚還設計了套餐供食客選擇，一位套餐折後$398，四位$1,688，六位$2,388元。而且，每位肯定有3隻清蒸大閘蟹食（2皇1后每隻五至六両），套餐還包他們的招牌家嫂糯米飯、蟹粉小籠包、酥炸廣島生蠔、煙燻鴨胸、黑松露元貝羹、驅寒的薑茶湯圓，並免費送一杯紅酒，令你食得飽飽又滿足。

這個套餐，中午、晚餐同價，而且周六丶周日也一樣價格，但要預先查詢，若晚上有人擺婚宴就可能座位有限，中午食就保險些。當日我們食四人餐，鏡頭下的是四人餐分量，12隻蟹上枱時也很澎湃。拆開熱騰騰的大閘蟹，金黃蟹膏令人食指大動，進食時配以鎮江醋，其味無窮。而且，家嫂糯米飯好食到原本食半碗改為一碗，酥炸廣島生蠔又很不錯。

如果人多認為不夠食或老人小孩不方便食大閘蟹，可以另外加叫星薈推出的時令蟹饌。例如，賽螃蟹肉餃，由經典菜式賽螃蟹變奏而成，餃子皮軟硬適中有韌勁，細滑的炒蛋白特別添加蟹肉及帶子，口感豐富，餃子吃起來香滑多汁，像在吃真蟹肉一樣。鮮蟹肉焗蟹蓋，最正就是啖啖肉，內裏還有芝士及洋葱，汁多肉豐，外層保持金黃酥香，鮮甜味美。

花雕雞油蒸肉蟹，則用雞油及花雕來蒸肉蟹，這個比例組合，大大提升了阿拉斯加蟹肉的鮮味，加上比大拇指還要粗大的蟹腳白肉，啖啖鮮甜充塞着嘴巴，鮮味及滿足感同樣爆燈。黃金酥炸軟殼蟹，超邪惡但超好味，軟殼蟹布滿鹹蛋黃，入口鬆脆無比，佐酒一流。

而冬瓜蟹肉鮑魚卷，冬瓜能消暑熱，祛濕又利尿，大廚特意將冬瓜切成薄片，包裹冬菇絲、蔬菜絲和鮑魚絲，再淋上蟹粉，清甜好味超吸引。蟹肉野菌忌廉湯，用了新鮮蟹肉與野菌忌廉同煮，蟹的清甜與鮮味融入野菌忌廉湯中，入口滑溜無比，鮮甜味足，超好飲。在星薈吃飯，還有戶外露台，飽覽維港景觀一流，價錢親民，超正。

地址︰九龍尖沙咀天文臺道8號21樓